Khan'to Nading a Kisam Lungsim Siangtho Ki Pumpiak
By Lian Khual
Innkuan khat a hi zong in, ki pawl na khat peuhpeuha hi zong in, pawlpi khat peuhpeuh a hi zong in, khua khat peuhpeuh a hi zong in, gam khat peuhpeuh a hi zong in, a khan'to nang, a ci dam nang, mi a phak nang, leh a tha hat nang in, a sung aa om mimal nih leh thum in ki pum piak na sep khiat na in a ki sam thu khat a hi hi. Hih ki pumpiak na ah, ki pumpiak na man tak a om kei leh tua innkuan, tua pawlpi,tua ki pawlna , tua khua, leh tua gam te zawng khal in, tha nem uh aa, tha zawm in, mai tai zo lo aa, mai gum in, khang to zo lo aa, kiamsuk zaw thei lai hi.
Innkuan sung ki pum piak na
Tulaitak khua hun pen, “ i gam sung kiukna hang maw..? A hih kei leh, Pasian daan hang maw? “ cih i thei kei hi. (Pasian in thei ding hi) I gam i lei ah nuntak hak sa in, khawh sa ki kham zo lo, kha sum ki khom lo, sum zon pai bawl ong lem lo semsem, innkuan sung nuntak zia pen ham sa semsem a hih man in, innkuan sung nun tak nang, ta te in, a hi thei bang in, mun dang gam dang mi gam mi lei ah, pau leh ham ki bang loh na mun ah, i khua i tui pan pai khia in, sum tam zawk na Lusei gam a hi zong in, kawlgam vaigam, tuipi gal dong ah ham sa pi tak in, ih innkuan aa ding, ki pumpiak in, i pau theih loh pipi pau sin tawm, ih sep ngei loh pipi na sep te sin tawm in, hanciam tak in sin tawm phu tawm in, i ki pat khiat ciang in ih ngah sunsun pek khat pek nih te, ih innkuan mah ih nu ih pa i sanggam te nek leh dawn ding ci in, i khen taitai ciang bek mah in, ih innkuan sung nek leh dawn tawmtawm in ong lem thei pan cih a hi hi.Hih mun ah ki pan khia ngam lo in a hih kei leh ih na sep na gam te khua te ah a mau te nun tak bang in nung ta in innkuan pih zi leh ta aa ki pan sang gam nu leh pa ngaih sun lo in mi zat bang in zang hi leng ,innkuan sung bang phat tuam na a om zen nam cih a lung ngaih huai thu hi aa, a tom in innkuan sung khan toh nang pen khat leh nih teitei in, ki pumpiak na ki sam teitei cih ong phawk sak hi.
Hih innkuan sung mah bang in, pawlpi sung, khua sung, gam sung i khan toh nang, khangno a kua ma ciat aa ki pan, nu leh pa, a ham a mui cih om lo in, a ki pumpiak, a ki piakhia ngam, a ki pan khia ngam, a ki sin ngam, a sem ngam, ham sa ta leh a lung kia lo, ki tel sin sen aa a phu ngam mi tampi ih ki sam hi .Lungsim siangtho tak tawh tel sinsen aa a ki pumpiak ngam i om kei leh i innkuan aa ki pan,pawlpi, a khua, a gam dong ah, i khang to ngei kei ding hi.
Thu khup na
Thu man thu tak tawh sep ding sep loh ding khen tel siam aa, gam leh minam, Pasian aa ding, guh tui kang dong in ,a ki pumpiak ngam, a phu ngam, a sem ngam, a pau ngam, lung sim siangtho a nei khang no tam pi i ki sam hi.
Lai sim mi mal kim Topa'n thupha ong pia hen la, gam leh minam, khua leh tui, pawlpi leh innkuan sung aa ding, lungsim siangtho sinsen ki pumpiak nop na lung sim te a thak in ong guan ta hen. Lung dam.
0 comments:
Post a Comment